Ҳуқуқҳои маъюбон аз ҷониби Парлумон ҳифз мегарданд

Имрӯз дар шаҳри Душанбе бо иштироки вакилони Маҷлиси намояндагон, роҳбарияти вазорати тандурустӣ ва ҳифзи иҷтимоии аҳолии Ҷумҳурии Тоҷикистон, “Барномаи идоракунӣ волоияти қонун ва ҳуқуқи инсон, “Иттиҳодияи миллии маъюбони Тоҷикистон”  мизи мудаввар  дар мавзӯи «Ҷаласаи якуми Гурӯҳи доимоамалкунанда оид ба ҳуқуқҳои маъюбон» баргузор гардид.

Дар назди иштирокчиёни мизи мудаввар Муовини Раиси Маҷлиси намояндагони Маҷлиси Олии Ҷумҳурии Тоҷикистон, узви вобастаи Академияи миллии илмҳои Ҷумҳурии Тоҷикистон, доктори илмҳои техникӣ Дилрабо Мансурӣ баромад намуда, иброз намуд, ки дар иртибот ба дастуру супоришҳои Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон ва ҷиҳати татбиқи воқеии Ҳадафҳои Рушди Устувор Маҷлиси намояндагони Маҷлиси Олии Ҷумҳурии Тоҷикистон дар назди Кумитаи Маҷлиси намояндагони Маҷлиси Олии Ҷумҳурии Тоҷикистон оид ба масъалаҳои иҷтимоӣ, оила ва ҳифзи саломатӣ аз ҳисоби вакилони Маҷлиси намояндагон, намояндагони сохторҳои давлативу хусусӣ ва шарикони рушд Гурӯҳи кории доимоамалкунанда оид ба ҳуқуқҳои маъюбон, моҳи марти соли 2022 созмон дода шуд.

Тавре маълум аст, то имрӯз якчанд Конвенсияҳои СММ аз ҷониби Ҷумҳурии Тоҷикистон эътироф гардида ва ё Ҷумҳурии Тоҷикистон ба онҳо ҳамроҳ гардидааст.

Шоиста ба зикр аст, ки бо дастгирӣ ва ташаббуси бевоситаи Асосгузори сулҳу ваҳдати миллӣ – Пешвои миллат, Президенти  Ҷумҳурии Тоҷикистон муҳтарам Эмомалӣ Раҳмон ҷиҳати ҳамроҳшавии Тоҷикистон ба Конвенсияи СММ дар бораи ҳуқуқҳои маъюбон, Фармон «Дар бораи ба имзорасонии матни Конвенсия дар бораи ҳуқуқҳои маъюбон» аз 2 феврали соли 2018 қабул гардид.

Тибқи фармони мазкур 22 марти соли 2018 дар ҳошияи кушодашавии чорабинӣ бахшида ба оғози Даҳсолаи байналмилалии амал“Об барои рушди устувор, барои солҳои 2018-2028” Пешвои миллат, Президенти кишвар дар бинои Созмони МилалиМуттаҳид, воқеъ дар шаҳри Ню-Йорки ИМА зери Конвенсияи Созмони Милали Муттаҳид «Дар бораи ҳуқуқҳои маъюбон» имзо гузоштанд.

Конвенсияи Созмони Милали Муттаҳид оид ба ҳуқуқҳои маъюбон аз тарафи Маҷмааи Умумии Созмони Милали Муттаҳид 13 декабри соли 2006 қабул гардида, 3 майи соли 2008 баъди аз ҷониби 20 давлат эътироф гардиданаш, қуваи қонунӣ гирифтааст.

Ҳамроҳшавии Ҷумҳурии Тоҷикистон ба Конвенсияи СММ дар бораи ҳуқуқҳои маъюбон пеш аз ҳама, ин иродаи сиёсии Президенти Ҷумҳурии Тоҷикистон муҳтарам Эмомалӣ Раҳмон мебошад. Дар баробари ин, омодагиҳои тадорукотии вазорату идораҳои дахлдор аз яктараф ва азму талошҳои ҷомеаи шаҳрвандӣ, хусусан иттиҳодияҳои ҷамъиятии маъюбон, аз тарафи дигар барои тадриҷан тайёр намудани заминаҳои иҷтимоию иқтисодии муносиб,ҷиҳати ҳамроҳшавии Тоҷикистон ба Конвенсия дар бораи ҳуқуқҳои маъюбон низ нек арзёбӣ мегардад.

Дар назди иштирокчиёни мизи мудаввар ҳамчунин раиси Кумитаи Маҷлиси намояндагон оид ба масъалаҳои иҷтимоӣ, оила ва ҳифзи саломатӣ Сумангул Тағойзода, муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон, аъзои гурӯҳи корӣ  Шодихон Ҷамшед, роҳбари Барномаи идоракунӣ волоияти қонун ва ҳуқуқи инсон Алишер Каримов, Раиси “Иттиҳодияи миллии маъюбони Тоҷикистон” аъзои гурӯҳи корӣ  Асадулло Зикрихудоев баромад намуда роҷеъ ба “Конвенсия дар бораи ҳуқуқҳои маъюбон ва зарурати таъсиси гурӯҳи кории доимоамалкунанда оид ба ҳуқуқҳои маъюбон дар назди Кумитаи Маҷлиси намояндагон оид ба масъалаҳои иҷтимоӣ, оила ва ҳифзи саломатӣ: мақсад ва вазифаҳо” ва “Муаррифии лоиҳаи Нақшаи кории (Шӯрои ҷамъиятӣ) гурӯҳи корӣ барои соли 2022” ахбороти муфассал доданд.