Ба мансаб таъин ва аз мансаб озод намудани роҳбарони сохторҳои маҳаллии маориф ба салоҳияти Вазорати маориф ва илми Ҷумҳурии Тоҷикистон гузошта мешавад

Вакилони Маҷлиси намояндагони Маҷлиси Олии Ҷумҳурии Тоҷикистон дар ҷаласаи якуми иҷлосияи дуюми Маҷлиси намояндагони Маҷлиси Олии Ҷумҳурии Тоҷикистон даъвати шашум,  ки имрӯз таҳти раёсати Раиси Маҷлиси намояндагони Маҷлиси Олии Ҷумҳурии Тоҷикистон Маҳмадтоир Зокирзода баргузор гардид, баъди садо додани суруди миллӣ, интихоби котиботи иҷлосия, комиссияи баҳисобгирии овозҳои вакилон, тартиби инъикоси кори иҷлосия, дар оғози иҷлосия лоиҳаи Қонуни конститутсионии Ҷумҳурии Тоҷикистон «Оид ба ворид намудани илова ба Қонуни конститутсионии Ҷумҳурии Тоҷикистон «Дар бораи мақомоти маҳаллии ҳокимияти давлатӣ»-ро мавриди баррасӣ қарор доданд.

Масъалаи мазкурро ба вакилони мардумӣ муовини аввали вазири маориф ва илми Ҷумҳурии Тоҷикистон Муҳаммаддовуд Саломиён ва вакили марудмӣ Шариф Ҳакимзода баррасӣ намуда, иброз доштанд, ки лоиҳаи Қонуни конститутсионии Ҷумҳурии Тоҷикистон «Оид ба ворид намудани илова ба Қонуни конститутсионии Ҷумҳурии Тоҷикистон «Дар бораи мақомоти маҳаллии ҳокимияти давлатӣ» бо тартиби ҳуқуқи ташаббуси қонунгузорӣ аз тарафи Ҳукумати  Ҷумҳурии Тоҷикистон пешниҳод шудааст.

Мақсад аз таҳияи лоиҳаи мазкур ба роҳ мондани низоми ягонаи назорат ва баланд бардоштани сифати таълиму тарбия дар муассисаҳои таҳсилоти миёнаи умумӣ мебошад. Ҷиҳати таъмини иҷрои ин мақсад аз ҷониби Вазорати маориф ва илми Ҷумҳурии Тоҷикистон ба мансаб таъйин ва аз мансаб озод намудани роҳбарони сохторҳои маҳаллии он пешбинӣ шудааст.

Лоиҳаи Қонуни Ҷумҳурии Тоҷикистон «Оид ба ворид намудани илова ба Қонуни Ҷумҳурии Тоҷикистон «Дар бораи маориф»-ро ба вакилони мардумӣ  муовини аввали вазири маориф ва илми Ҷумҳурии Тоҷикистон Муҳаммаддовуд Саломиён ва раиси Кумитаи Маҷлиси намояндагон оид ба илм, маориф, фарҳанг ва сиёсати ҷавонон Содиқӣ Насиба муаррифӣ намуда, изҳор доштанд, мутобиқи лоиҳа ба Қонуни мазкур илова ба моддаи 33 ворид мегардад, ки тибқи он дар мувофиқа бо раисони Вилояти Мухтори Кӯҳистони Бадахшон, вилоятҳо, шаҳри Душанбе, шаҳр ва ноҳияҳои ҷумҳурӣ ба мансаб таъйин ва аз мансаб озод намудани роҳбарони сохторҳои маҳаллии маориф ба салоҳияти Вазорати маориф ва илми Ҷумҳурии Тоҷикистон гузошта мешавад.

Дар ҷаласа ҳамчунин Созишнома байни Ҳукумати Ҷумҳурии Тоҷикистон ва Ҳукумати Ҷумҳурии Федеративии Германия дар бораи ҳамкории техникӣ барои солҳои 2018-2019 баррасӣ гардид, ки вазири рушди иқтисод ва савдои Ҷумҳурии Тоҷикистон Завқизода Завқӣ Амин ва вакили мардумӣ Ашуров Ғиёсиддин масъалара шарҳу тафсир намуданд. Дар ҷаласа қайд гардид, ки Созишномаи мазкр бо мақсади баланд бардоштани малака ва қобилияти муҳоҷирони меҳнатӣ, инчунин фароҳам овардани имкониятҳои таълимӣ бо дарназардошти талаботи бозори меҳнат ва ихтисосмандкунонии муҳоҷири меҳанатӣ ва оилаҳое, ки бо муҳоҷирати меҳнатӣ алоқаманданд равона карда мешавад. Лоиҳа барои расидан ба Ҳадафҳои Рушди Устувор, аз ҷумла паст намудани сатҳи камбизоатӣ, баробарии гендерӣ, шуғли пурмаҳсул ва рушди иқтисодӣ ва паст кардани нобаробарӣ мусоидати зарурӣ хоҳад кард.

Масъалаи ниҳоии рӯзнома: «Дар хусуси нақшаи ҳудудии минтақаи озоди иқтисодии Кӯлоб»-ро низ ба вакилони мардмӣ вазири рушди иқтисод ва савдои Ҷумҳурии Тоҷикистон Завқизода Завқӣ Амин ва вакили Маҷлиси намояндагон Раҳмонзода Зоир муаррифӣ намуда, изҳор доштанд, ки ҳадаф аз ташкили Минтақаи озоди иқтисодии Кӯлоб ин таъмин намудани аҳолии минтақа ва ҷумҳурӣ бо кор, ташкили ҷойҳои нави корӣ, баланд бардоштани сатҳи зиндагии аҳолӣ, беҳтарсозии қобилияти харидорӣ ва ҳалли дигар масъалаҳои иҷтимоию иқтисодии минтақа маҳсуб меёбад.

Масъалаҳои мазкур аз ҷониби вакилон ҷонибдорӣ шуда, доир ба тасдиқи масъалаҳо қарорҳои дахлдори Маҷлиси намояндагон қабул карда шуд.