Вакили Маҷлиси намояндагон Баҳриддин Зиёӣ дар Ашт бо интихобкунандагон оид ба ҳалли мушкилоти мавҷуда суҳбат намуд

08 Январ 2021, Ҷумъа

Айни замон дар  ноҳияи Ашт ду мушкили асосӣ вуҷуд дорад: таъмири роҳи Ашт-Хуҷанд ва пойгоҳҳои обкашии ноҳия, ки наздики ним аср дар хизмати кишоварзону боғпарварони ноҳия  қарор дорад. Ин  ва дигар масъалаҳо, ки  ҳалли онҳо ба некӯаҳволии мардум мусоидат менамояд, зери таваҷҷуҳи Ҳукумати мамлакат қарор дошта, дар ин самт тадбирҳои зарурӣ андешида мешаванд.
Ин матлабро вакили Маҷлиси намояндагони Маҷлиси Олии Ҷумҳурии Тоҷикистон Баҳриддин Зиёӣ зимни мулоқот  бо интихобкунандагон дар Ҷамоати шаҳраки Шайдони ноҳияи Ашт иброз намуд.
7 январ дар толори ин мақомот  вакили Маҷлиси намояндагони Маҷлиси Олии Ҷумҳурии Тоҷикистон аз ҳавзаи интихоботии Ашт №17 Баҳриддин Зиёӣ бо интихобкунандагони Ҷамоат вохӯрӣ намуд.
Дар мулоқот роҳбарони сохторҳои қудратӣ, корхонаву ташкилотҳо, фаъолон ва сокинони Ҷамоати шаҳраки Шайдон иштирок доштанд.

Баҳриддин Зиёӣ дар бораи самтҳои фаъолияти Маҷлиси намояндагони Маҷлиси Олии Ҷумҳурии Тоҷикистон,  ҳамчунин аз фаъолияти кории худ  ҳамчун вакил маълумоти мухтасар дод. Мавсуф  таваҷҷуҳи ҳозиринро  ба сарфакорона истифода бурдани нерӯи барқ, вусъат бахшидан ба корҳои созандагиву бунёдкорӣ ҷиҳати пешвози сазовори 30-солагии Истиқлолият, пешгирии бемории сироятии КОВИД-19, захираи озуқаворӣ ба василаи истифодаи самараноки заминҳои наздиҳавлигӣ ва танзими ҷашну маросим ҷалб намуда, бо таҳлили вазъи ҷаҳони имрӯз ҷиҳати пешгирии шомилшавии ҷавонон ба ҳизбу ҳаракатҳои номатлуб, таълимоти ғайрирасмии динӣ, бетараф набудан дар ҳаёти фарзандон андешаҳои судманд изҳор намуд.
Баҳриддин Зиёӣ   бо ёдоварӣ аз Муроҷиатномаи навбатии Ширкати саҳҳомии холдингии кушодаи “Барқи тоҷик” изҳор дошт, ки имрӯз воқеан пешгӯии ҳолат ва сатҳи оби дарёҳои барқтавлидкунанда душвор аст ва яке аз роҳҳои ҳалли ин мушкилот бегумон сарфакорона истифода бурдани нерӯи барқ маҳсуб мешавад.
“Имрӯз ҳарчанд аз ҷониби Ҳукумати кишвар ҷиҳати рафъи душвории бамиёномада тадбирҳои оҷилӣ андешида мешаванд (аз ҷумла қатъ шудани интиқоли нерӯи барқ ба кишварҳои ҳамсоя), аммо табиист дар ин самт истифодаи сарфакоронаи барқ чӣ аз ҷониби аҳолӣ ва чӣ коргоҳу муассисаҳо муҳим арзёбӣ мешавад”,-афзуд номбурда.
Дар мулоқот ҳамчунин намояндаи Раёсати маорифи вилояти Суғд Набиҷон Раҳмонов ва устоди ДДХ ба номи Б.Ғафуров Ӯғулой Умаралиева дар самти амалӣ намудани Қонунҳои Ҷумҳурии Тоҷикистон  “Дар бораи масъулияти падару модар дар таълиму тарбияи фарзанд” ва “Танзими анъана ва ҷашну маросим дар Ҷумҳурии Тоҷикистон”, пешгирии таълимоти ғайрирасмии динӣ ва гаравидани наврасону ҷавонон ба гурӯҳҳои ифротӣ, сарфакорӣ дар ҷашну маросим сухан гуфтанд.
Дар анҷоми мулоқот Раиси ноҳия Зариф Мирдадо бо овардани рақамҳо аз самтҳои мухталифи хоҷагии халқи ноҳия таъкид намуд, ки ҷиҳати пешгирии бемории сироятии коронавирус, истифодаи  сарфакоронаи нерӯи барқ, амалӣ намудани нуктаҳои ду қонунҳои болозикр, таваҷҷуҳи бештар зоҳир кардан дар тарбияи насли наврас дастаҷамъона кӯшиш ба харҷ дода шавад.
Ёдовар мешавем, ки тибқи дастури Маҷлиси намояндагони Маҷлиси Олии Ҷумҳурии Тоҷикистон аз санаи 1 то 9 январи соли равон мулоқоти вакилони МН МО ҶТ бо интихобкунандагон баргузор мегардад.

Илова кунед